ਫ਼ੌਜੀ ਦੀ ਫ਼ੈਮਿਲੀ’ ਰਾਹੀਂ ਕਾਮੇਡੀ ਟੈਲੀਫ਼ਿਲਮਾਂ ਦੇ ਪਿੜ ਵਿੱਚ ਉੱਤਰੇ ਗੁਰਚੇਤ ਚਿੱਤਰਕਾਰ ਨੂੰ ਟੈਲੀਫ਼ਿਲਮਾਂ ਦਾ ਜਨਮਦਾਤਾ ਵੀ ਕਿਹਾ ਜਾਂਦਾ ਹੈ। ਉਸ ਦੀ ਹਰ ਫ਼ਿਲਮ ਦੀ ਉਡੀਕ ਲੋਕ ਬੜੀ ਬੇ-ਸਬਰੀ ਨਾਲ ਕਰਦੇ ਹਨ। ਉਸਦੀਆਂ ਫ਼ਿਲਮਾਂ ਜਿੱਥੇ ਲੋਕਾਂ ਨੂੰ ਹਾਸੇ ਦੇ ਕੁਝ ਪਲ ਪ੍ਰਦਾਨ ਕਰਦੀਆਂ ਹਨ ਉਥੇ ਨਾਲ ਹੀ ਇਹਨਾਂ ਵਿੱਚ ਕੋਈ ਨਾ ਕੋਈ ਸਮਾਜਿਕ ਸੁਨੇਹਾ ਵੀ ਜ਼ਰੂਰ ਹੁੰਦਾ ਹੈ।
ਆਪਣੀਆਂ ਫ਼ਿਲਮਾਂ ਰਾਹੀਂ ਦੇਸ਼-ਵਿਦੇਸ਼ ਦੇ ਪੰਜਾਬੀਆਂ ਦੇ ਮਨ ਮੋਹਨ ਵਾਲਾ ਇਹ ਕਲਾਕਾਰ ਬੀਤੇ ਦਿਨੀਂ ਅਮਰੀਕਾ ਅਤੇ ਕੈਨੇਡਾ ਦੀ ਧਰਤੀ ’ਤੇ ਇੱਕ ਨਾਟਕ ‘ਨੌਟੀ ਬਾਬਾ ਬੈਕ ਇਨ ਟਾਊਨ’ ਖੇਡ ਕੇ ਆਇਆ ਹੈ ਜਿਸ ਰਾਹੀਂ ਉਸਨੇ ਓਧਰ ਵਸਦੇ ਪੰਜਾਬੀਆਂ ਦਾ ਭਰਪੂਰ ਮਨੋਰੰਜਨ ਕੀਤਾ। ਆਪਣੀ ਇਸ ਵਿਦੇਸ਼ ਫੇਰੀ ਬਾਰੇ ਵਿਚਾਰ ਪ੍ਰਗਟਾਉਂਦਿਆਂ ਗੁਰਚੇਤ ਨੇ ਕਿਹਾ ਕਿ ਉਹ ਬੀਤੇ ਵਰ੍ਹੇ ਵੀ ਕੈਨੇਡਾ ਦੀ ਧਰਤੀ ’ਤੇ ਇੱਕ ਨਾਟਕ ‘ਨੌਟੀ ਬਾਬਾ ਇਨ ਟਾਊਨ’ ਖੇਡ ਕੇ ਆਇਆ ਸੀ ਜਿਸਨੂੰ ਓਧਰਲੇ ਪੰਜਾਬੀਆਂ ਨੇ ਬਹੁਤ ਪਸੰਦ ਕੀਤਾ ਸੀ ਤੇ ਉਹਨਾਂ ਦੀ ਪੁਰਜ਼ੋਰ ਮੰਗ ’ਤੇ ਉਹ ਇਸ ਵਰ੍ਹੇ ਫਿਰ ਕੈਨੇਡਾ ਅਤੇ ਅਮਰੀਕਾ ਵਿਖੇ ਉੱਘੇ ਅਦਾਕਾਰ ਬੀਨੂੰ ਢਿੱਲੋਂ ਦੀ ਟੀਮ ਜਿਸ ਵਿੱਚ ਗੁਰਚੇਤ ਅਤੇ ਬੀਨੂੰ ਢਿੱਲੋਂ ਤੋਂ ਇਲਾਵਾ ਜਸਵਿੰਦਰ ਭੱਲਾ, ਜਸਪਾਲ ਭੱਟੀ, ਕਰਮਜੀਤ ਅਨਮੋਲ, ਗੁਰਦੀਪ ਕਕਰਾਲਾ, ਸਿਮਰਨ, ਰੀਆ ਸਿੰਘ ਅਤੇ ਰਵਿੰਦਰ ਮੰਡ ਸ਼ਾਮਲ ਹਨ ਨਾਲ ਨਵਾਂ ਨਾਟਕ ‘ਨੌਟੀ ਬਾਬਾ ਬੈਕ ਇਨ ਟਾਊਨ’ ਖੇਡ ਕੇ ਆਇਆ ਹੈ। ਗੁਰਚੇਤ ਅਨੁਸਾਰ ਉਸਨੂੰ ਅਮਰੀਕਾ-ਕੈਨੇਡਾ ਵਸਦੇ ਪੰਜਾਬੀਆਂ ਨੇ ਬਹੁਤ ਪਿਆਰ ਅਤੇ ਇੱਜ਼ਤ ਨਾਲ ਨਿਵਾਜਿਆ ਹੈ ਜਿਸ ਨੂੰ ਕਿ ਉਹ ਕਦੇ ਵੀ ਭੁਲਾ ਨਹੀਂ ਸਕਦਾ।
ਇਸ ਵਰ੍ਹੇ ਉਸਦੀ ਫ਼ਿਲਮ ‘ਫ਼ੈਮਲੀ-426’ ਨੂੰ ਪੀ|ਟੀ|ਸੀ| ਐਵਾਰਡ ਮਿਲਣ ’ਤੇ ਵੀ ਉਹ ਬੇਹੱਦ ਖੁਸ਼ ਹੈ ਕਿ ਲੋਕਾਂ ਨੇ ਉਸਦੇ ਕੀਤੇ ਹੋਏ ਕੰਮ ਉੱਪਰ ਪ੍ਰਵਾਨਗੀ ਦੀ ਮੋਹਰ ਲਾਈ ਹੈ। ਸਮੂਹ ਪੰਜਾਬੀਆਂ ਵੱਲੋਂ ਉਸ ਵਿੱਚ ਪ੍ਰਗਟਾਏ ਵਿਸ਼ਵਾਸ ਸਦਕਾ ਹੀ ਉਹ ਆਉਣ ਵਾਲੇ ਕੁਝ ਇੱਕ ਦਿਨਾਂ ਵਿੱਚ ਆਪਣੀ ਇੱਕ ਧਾਰਮਿਕ ਫ਼ਿਲਮ ‘ਸਰਬੱਤ ਦਾ ਭਲਾ’, ਇੱਕ ਹਿਮਾਚਲੀ ਕਾਮੇਡੀ ਫ਼ਿਲਮ ‘ਫ਼ੈਮਲੀ ਨੰਬਰ-1’ ਅਤੇ ਆਪਣੀ ‘ਫ਼ੈਮਲੀ’ ਸੀਰੀਜ਼ ਦੀ ਅਗਲੀ ਫ਼ਿਲਮ ‘ਫ਼ੈਮਲੀ-427’ ਲੈ ਕੇ ਆ ਰਿਹਾ ਹੈ ਜਿਸ ਤੋਂ ਉਸਨੂੰ ਢੇਰ ਸਾਰੀਆਂ ਉਮੀਦਾਂ ਹਨ। ਆਪਣੀਆਂ ਕਾਮੇਡੀ ਫ਼ਿਲਮਾਂ ਰਾਹੀਂ ਹਾਸੇ ਵੰਡਣ ਵਾਲੇ ਇਸ ਬਾ-ਕਮਾਲ ਅਦਾਕਾਰ ਤੋਂ ਸਭ ਪੰਜਾਬੀਆਂ ਨੂੰ ਬੇਹੱਦ ਆਸਾਂ ਹਨ।
ਹਰਿੰਦਰ ਸਿੰਘ ਭੁੱਲਰ
ਫ਼ਿਰੋਜ਼ਪੁਰ
ਮੋਬਾਇਲ-94640-08008
ਈ-ਮੇਲ-harinderbhullar420@yahoo.com
No comments:
Post a Comment